O noso obradoiro está enraizado en Bentraces, no Concello de Barbadás. Comezamos a fabricación de instrumentos de música tradicional con marca artesanía de Galicia no 2017. Pero o ritmo e o labor veñen de atrás; Pablo Martínez, as mans e o ritmo do noso obradoiro leva dende os once anos envolvido no mundo da música, como instrumentista e docente. E combina a formación musical co traballo de luthier, que encetou como aprendiz aos vinte e cinco anos da man de Fernando Forneiro.
Somos o que facemos
Pablo Martínez pola mañá dá clases, pola tarde fai instrumentos, e cando a xornada o permite, no serán, únese á foliada. O Conservatorio, a Real Banda de Gaitas de Ourense e a banda dos Trasnos do barrio ourensán do Vinteún foron unha escola fundamental. Como docente deu aulas en Entrimo, na Gudiña, en Vilariño de Conso, en Trives e en Esgos. Hoxe dirixe a Banda de Gaitas Nova Fronteira da Valenzá e tamén imparte aulas na escola municipal de música de Barbadás.
Como luthier acumula máis dunha década de formación e traballo, adicado a perfeccionar e afondar na técnica e mellora de cada instrumento.
Máxima esixencia en materiais e procesos
Pablo Martínez Musical combina a maior esixencia na selección de materiais e o perfeccionamento técnico na elaboración artesanal de cada instrumento con coñecementos musicais profesionais, maridaxe perfecta para chegar a facer de cada peza unha obra de deseño única, optimizada para lograr o son máis depurado.
O alicerce é traballar con materias primas de primeiro nivel; contamos cos mellores proveedores para palletas, pallóns, peles para percusión, téxtil para vestidos e material para foles. En madeiras autóctonas seleccionamos o mellor buxo galego, e para as de importación dispomos dun proveedor punteiro: Maderas Barbes, sendo clientes e tamén distribuidores para o norte da península, incluíndo Portugal. Para os foles de novo buscamos a idoneidade e integramos materiais de vangarda como o gore-tex, para o que traballamos con Gore Tex Canmore, sendo clientes e tamén distribuidores da marca para España e Portugal.
Prioridade na innovación
A principal aposta é a investigación, conseguir un instrumento que abarque todas as necesidades do músico. A procura constante en materiais que dean os mellores resultados a nivel de son, estabilidade e durabilidade. De aí a prioridade na innovación, da que a integración dos foles de gore-tex son bo exemplo.
A calidade e evolución no musical avanza, os instrumentistas son hoxe mellores que nunca, e cada detalle é importante para facer que os instrumentos estean á altura dos músicos máis esixentes. Pablo Martínez traballa a diario con atención a un son impecábel e coa destreza e exclusividade da realización manual, así un instrumento asinado por Pablo Martínez é unha peza de autor. Elaborado baixo demanda, personalizado ao detalle, no noso obradoiro deseñamos un instrumento exclusivo para ti.
